Friday, 26 July 2013

GÕYCHI MUKTI ANI MOG



“Gõyank suttka mellunk thoddinch vorsam urlolim. Doxim vattamnim suttke zhuzari chollvolli choloytale. He chollvollintlo ek zhuzari aslo, Zuzart. To bhiyenastanam Purtugezam add zhogoddlo. Sogllo lok tachi toknnay kortale. Tachi toknnay aikonuch Catharina tachea mogant poddlem. Gõychi suttka korunk zhuztanam Zuzartan aplo jiv vompun dilo. Hech karonnank lagon ‘Catharina’ hem sobit nanv ‘Kotrin’ zalem,” oslea utramnim Willy Goes-achea Kotrin kadom’boricho attap (blurb) vachlo ani dekhunuch hi kadom’bori vachunk mhaka chodd umollxik lagli.
            Hi kadom’bori Gõychea Suttke ani rajbhas andolonache fattbhuimyer attaploli asa. Kotrin don ostoreanchi kotha: Catharina jem eka suttke zhuzareachea mogan poddta ani Venisha jem Mon’xastr xikta. Venisha aplea xikxonnak ani eka yogayogak (chance) lagun Catharinachea jivitacher obheas korunk pavta.
Catharina/Kotrin apunn gorbest asam oxem somzota. Hem bhurgem Kotrinak Zuzartachem dista karonn tachi mansik stithi pirdear zaloli asta. Kotrinak khobor asta Zuzartak Purtugez pulisvale, ani odik korun Agente Monteiro piddapidd ditale mhonn. Venishacho bapuy-i ek pulis odhikari asta ani durdoivan tacheim nanv Monteiro asta! Dekhun jednam Kotrin aplea pisantt bhesar Venishachea bapaik sobhemazar hinnsaita tednam Venisha Kotrinachea jivitacher obheas korunk pavta.

Kotrin pixem kiteak zaunk pavta? Hi kadom’bori vachlea uprant amkam kollun yeta ki Catharina Zuzartachea mogan poddta karonn tannem ganvche lok Zuzartachea dhaddxiponnachi khobor kortat tem aikololem. Punn Catharinan Zuzartak kednanch polleunk nam ani mellunkui nam. Catharinachea bhurgeaponnachi ek sonvõy mhullear taka konneim, koslea-i vostuchi tust-tokhnnay korit zalear taka ti vost zaich asli ani tem oslem tem’ gheun bostalem. Mhojea mota pormonnem hanga Willy Goes-an Catharinachem patr anink sudravunk zatalem. Mon’xastrache nodrentlean hem patr ubem korta astanam aninkui jiv funkpachi ani mitt-mirsanganchi goroz asli kiteak Kotrin hench zaun asa ‘keystone’ he kadom’boricho. Ek bhurgeponnachi sonvõy pixeaponnachea bhesar pavounk xokta, hem dhoronn matxe dubllem dista.
            Hi kadom’bori Gõychea Suttke ani rajbhas anodolona vellar guntloli asa dekhun Romintle borovpi oslea vixoyancher aplem borovp kortat tem pollounk borem dista. Punn hachi dusri bazu mhollear itihasachea veg-vegllea surank ani talleank ami tor parkhunk xokonant zalear ami khoim tori chukonk xoktat ani hi gozal bori nhoi. Oslea vixoyancher zori ami boroytat zalear amkam itihasacher ani vosnnukponnacher (colonialism) ttika-i korop bhov gorjechem tharta. Punn hem kortanam mat ami huxarkayen ani choturayen korchi goroz asa. (Zoxem Salman Rushdie Midnight’s Children he aple kadom’borint korta).

Dekhik, Willy Goes jednam Gõyche Suttkechi ani suttke zhuzareanchi khobor korta tednam tachem dhoronn oxem disun yeta: tea kallar Purtugez vosnnukponnacher virud’dh soglle asle mhonn. Punn tem oxem asonk nam. Kaim zonn fokot Salazarachea hukumxayecher virud’dh asle ani nhoi sogott Purtugezancher.       
Hi kadom’bori Kotrinachea mornnacher sompta. Venishachea nhovreak Zuzartachi ‘part’ korchi podddta karonn Kortin mornnachea vellar pasun Zuzartakuch usketa. Kotrinachem moronn zorui ‘dramatic’ toren dakhoilam torui Willy Goes amchea kallzak hat ghalunk yesosvi zala.
Willy Goes Konknniche Romi lipientlo ek moladik borovpi oxem hanv mandtam ani tachem borovp naslem zalear Konknni sorospot khuim tori dublli thartoli asli oxem-i hanv kollit kortam. He kadom’borint zaitim Purtugez utram asat ani tim asat mhunnon he kadom’borik ek vegllich ruch ailea. Willy Goes-an oxench boroit ravchem, hoch amcho anvddo.


Kotrin borovpi Willy Goes (Ponnje: Dalgado Konknni Akademi), 2012; panam 135, Mol 100/-; Fon: 91-0832-2221688 


Inglezintlean hoch lekh vach hanga.

No comments:

Post a Comment