Saturday, 17 August 2013

EK-ANKI UPDES ANI SONDEX



Tiatr ani nattkulim Gõyant khub famad. Halinchea kallar tiatranchim vo nattkuleanchim hat-borovpam chhapun yetat (chodd korun Tiatr Academy-ntlean) hi gozal bhov khuxalkayechi. Osleach borpavollinchem ek pustok mhollear Arso: 26 Nattkuleancho Jhelo jem Pri. Michael Fernandes hannem boroilam. Hea pustokachem khaxelponn mhollear sovis-ui nattkuleanche mathalle, A-Z hea 26 Inglez okxoranche volleri promannem asat.
            Pri. Michael Fernandes-achem borovp Jivit, Gulab, Goan Review, V. Ixtt and kaim firgoz-potrancher uzvaddak ailam. Nibon’d, kannio, kovita, kantaram oxe sahityache sabar prokar tannem hatall’leat.  Arso hem tachem poilem nattkuleanchem pustok.
            Hea pustokacher nodor martoch amkam disun yeta ki him nattkulim bori dekh ani xikovnn diunk boroileant. Kannio sompeo asat ani hakach lagun borovpeak bori dekh diunk adar ditat. Bhurgeponnavoilo mog, vhoddilank respet ani man divop, promannikponn, Kristi mul’lyam , soimacho husko, adi osle mud’de hea pustokant borovpian ghetleat. Gõychi osmitay ani daiz, bhailo lok ani tanchea probhavank lagon je bodol ami onnbhovtat, osle-i mud’de Pri. Michael Fernandes-an amche mukhar manddleat.           
            Hea pustokant amkam oxem dison yeta ki jim patram vaitt monis mhunnon dakhoileant tanchem kalliz ani mon rokddench bodolta. Je toren – ani sompeponnim – him patram apunn borea rostear choltole mhonn utor ditat tantum kholay disun yenam. Punn ek-anki nattkuleank vell ani zago unno asta hem monant dhorun, borovpeachi hi oddchonn amcheamni somzum yeta.
Bãym hea nattkuleant Pri. Michael Fernandes amchea paromporik bãychem mhotv dakhoita ani ami udok kiteak chotrayen vaprunk zai temvui dakholl korta. Hea nattkuleant Saxtti boli vapurlolean ruch anink vaddlea. Dusrea-i kaim nattkuleamni Gõycheo her bolio vapurleat ani haka lagun borovpeak porbim! Kaim nattkuleamni je sonvad (dialogues) vapurleat te padriche sermanv koxe distat. Dekhik: Advogad. Sogllea suvatancher Povitr Pustokantle nomunne diupachi goroz asa,  hoi?
            Zantteanchi ani kheritponnim amchea avoy-bapaychi ami seva korunk zai hem dhoronn ak’khea pustokant amkam mellta. “Dor eka putak ani dhuvek mhozo ulo – tumchim avoy-bapuy kitlim-i zanttim pasun zalear, tankam pois korum nakat, nhoi mhonn azilant-ui ghalum nakat. Kiteak, je tyag ani koxtt tumchim avoy-bapuy tumche khatir kaddtat te sonvsarantle her khuinchech monis kaddchenant.” Pri. Michael Fernandes-achem hem dhoronn zorui hanv mandun ghetam torui hea rostear cholunk sodanch vatt meklli asta kai?
            Kaim nattkuleancho hangasor hanv ul’lekh korunk sodtam. Maim hea nattkuleant, Alroy-ak  sirvis mellunk ek lak farik korunk zai asta. Punn te itle duddu taka  mellttole zalear tannem poilim Saibinn mãycheo murteo moddunk zai asta ani Saibinnicher bhavarth dovorpant kaim boreponn ani faido nam oxem soglleank kollit korunk zai asta. Alroy oxench korta ani rokddoch taka aksident zata. Toxench Tallnni hea nattkuleant, ji zaun asa kanni dog supurlea bhavanchi, tanchi avoy tankam promannikponnan lisanv korunk sangta ani apunn bazarant veta. Eklo bhav tallnnek sampoddta ani aplea ixttam barabor khellpak veta ani thoimsor buddun morta.  ‘Devan-khast-laili’ osle vichar Pri. Michael Fernandes-a sarkea tornattea padrin soddun diunk zai. Amchea jivitant unneponnam asat, chuki ghoddtat hem monant dhorun ami amchem jivit jiyeunk zai, oslem novsorlolem  chintop khub gorjechem.
Hea nattkuleanchea jheleant zaite vixoy (themes) portun portun distat tori tanchi vachta asatanam addkholl zata oxem disonam. Kovorachem chitr Alvito D’Costa-n bore bhaxen kelam. Xevottak, hem pustok vachpak ruchichem asach ani iskolamni ‘Annual Gatherings’-a vellar machier haddunk khub faideachem poddtolem oxem hanv sobhemazar sangtam. Pri. Michael Fernandes-a sarkea tornattea borovpeank oslench protsahon mell’llear Konknnichem Sahitya pormollun, aninkui borovpi  mukhar sortole nhoi?

            Arso: 26 Nattkuleancho Jhelo borovpi Pri. Michael Fernandes (Bann’nnavle: Micferns Prokaxon), 2010; panam IX+237, Rs. 100/-; Fon: 91-0832-2221688 (Mellta: Dalgado Konknni Akademi, Ponnje)


            Inglezint hoch lekh vach hanga.

No comments:

Post a Comment